Respublika Veteranlar Təşkilatında Azərbaycanda təhlükəsizlik orqanlarının yaradılmasının 100 illiyi qeyd edilib

Martın 19-da Respublika Veteranlar Təşkilatında Azərbaycanda təhlükəsizlik orqanlarının yaradılmasının 100 illiyi münasibətilə tədbir keçirilib.

AZƏRTAC xəbər verir ki, tədbirin məqsədi dövlətçiliyimizin, milli maraqlarımızın etibarlı qorunmasında dövlət təhlükəsizlik orqanlarının fəaliyyətinin gənc nəslə çatdırılması olub.

Azərbaycan Respublikası Müharibə, Əmək və Silahlı Qüvvələr Veteranları Təşkilatının sədri, general-polkovnik Tofiq Ağahüseynov tədbirdə çıxış edərək xüsusi xidmət orqanlarının Azərbaycan xalqı və dövlətçiliyi qarşısındakı taleyüklü fəaliyyətindən, ulu öndər Heydər Əliyevin bu sahədə həyata keçirdiyi islahatlardan, Prezident İlham Əliyevin milli təhlükəsizliyin təminatında gördüyü işlərdən danışıb. O, Azərbaycan xüsusi xidmət orqanları əməkdaşlarının vətənpərvərliyini, əzmkarlığını, ayıq-sayıqlığını yüksək qiymətləndirib.

Respublika Veteranlar Təşkilatının sədr müavini, polkovnik Cəlil Xəlilov xüsusi xidmət orqanlarının Azərbaycan tarixindəki rolundan, respublikamızda milli təhlükəsizliyin hərtərəfli təminatından, şəxsiyyətin, cəmiyyətin və dövlətin milli maraqlarının qorunmasından söz açıb. C.Xəlilov Azərbaycan Xalq Cümhuriyyəti dövründə milli təhlükəsizlik orqanlarının formalaşdırılmasından, xalqımızın ümummilli lideri Heydər Əliyevin sovet dövründə və müstəqillik illərində bu sahədəki fəaliyyətindən danışıb. Ulu öndər Heydər Əliyevin dövlət strukturlarının, o cümlədən təhlükəsizlik orqanlarının inkişafına və təkmilləşməsinə diqqət və qayğısının hər zaman xatırlandığını bildirən C.Xəlilov bu siyasətin hazırda Prezident İlham Əliyev tərəfindən inamla və uğurla davam etdirildiyini söyləyib.

Respublika Veteranlar Təşkilatının sədr müavini Ermənistanın düşmənçilik siyasətinin qarşısının alınmasında xüsusi xidmət orqanlarının daim hazır olduğunu qeyd edib: "Ermənistan-Azərbaycan Dağlıq Qarabağ münaqişəsində xüsusi xidmət orqanlarının əməkdaşları fədakarlıqlar göstərib, əsl vətənpərvərlik nümayiş etdiriblər. İnanırıq ki, bu gün gənclərimiz milli təhlükəsizliyimizin təminatında əllərindən gələni edəcək, xüsusi xidmət orqanlarına dəstəklərini və yardımlarını daha çox göstərəcəklər. Gənclər həyatlarını Vətənə, xalqına xidmətə həsr etmiş xüsusi xidmət orqanlarının əməkdaşlarından və veteranlardan nümunə götürəcəklər”.

Çıxışında ölkəmizin təhlükəsizlik orqanlarının fəaliyyətindən söz açan "Alyans” Azərbaycanın Xüsusi Xidmət Orqanlarının Veteranları İctimai Birliyinin sədri Şamil Süleymanov ümummilli lider Heydər Əliyevlə bağlı xatirələrini bölüşüb: "Təhlükəsizlik orqanlarında fəaliyyətə başlayanda ilk görüşdüyüm şəxs Heydər Əliyev idi. Otuz altı illik fəaliyyətimi Ulu Öndərin məsləhətləri üzərində qurmuşam. Ümummilli Lider sadə və qayğıkeş insan idi. Heydər Əliyev təkcə xüsusi xidmət orqanları üçün deyil, digər hüquq-mühafizə orqanları üçün də milli kadrların yetişdirilməsinə çalışır, Azərbaycanın inkişafı üçün əlindən gələni əsirgəmirdi”.

Yazıçı-publisist Azər Hacıbəyli və başqaları təhlükəsizlik orqanlarının fəaliyyətinin cəmiyyətdə yüksək qiymətləndirildiyini, dahi şəxsiyyət Heydər Əliyevin siyasi xəttini qətiyyətlə davam etdirən Prezident İlham Əliyevin rəhbərliyi ilə ölkəmizin hərtərəfli tərəqqisi naminə görülən işlər nəticəsində Azərbaycanın dünyada ən sabit və təhlükəsiz ölkələrdən birinə çevrildiyi diqqətə çatdırıblar.

Tədbirin sonunda "Alyans” Azərbaycanın Xüsusi Xidmət Orqanlarının Veteranları İctimai Birliyinin bir qrup əməkdaşı Respublika Veteranları Təşkilatı tərəfindən fəxri fərmanla təltif edilib.